Pathianthu Siarnak


view:  full / summary

Nannih cu Meifar Nan Si!

Posted by Pastor Biak on July 14, 2015 at 11:40 PM Comments comments (0)

Thuhmaihruai

Hi Bibal cang (Matt. 5:14) suangkhang in, ka hmin in saktu ka pa, Rev. No Ling ih a duh bikmi a si.  Kum 8 hrawngah Mino khawm caan ih Baibal zohlo siar dingin U Bual Hnok in caan in thiah.  Sunglam in ttihnak a um.  Rawl ei - zaan it - tlawngkai - hramlak feh - caw hawl - ziangvek ka tuah khalle ka nuam lo.  Zohman ih theihpi thei lomi phurhrit ka nei.  Keimah lawngin ka thei.  Sunday zaan a kim ka siar ngam lo ruangfah phualam hawlin ka khawm lo.  Ka phurhrit a zaang cuang lo.  "Thlarau phurhrit cu hivek maw?" timi ka nauhak in ka rak fiang.  Thlaruk lai a reihnu Baibal zoh lo siar in thiahsaal lala.  Ka unu, Tuan Hngel zuampinak in ka siar, ka phurhrit a zaang, lungawinak ka tep.  Pathian hnen lungthlengnak le ka nuntharnak dingih lamzin kapkhat cu a rak sive.

1. Jesuh cu a to ih a kam a kau ... (5:1-2) Israel pawl (Greek san ihsin) thupi zetmi an sim tlang tinak a si.  Matt. 5:14 "Nan si hrih lo a ti lo (Not yet),  Nan si thei men (posibility) - Nan si lai ding/ Nan si leh ding (future), Meifar si hram uh! (request), Nan duh le si uh? (option) a si lo.  Kan duh khalle/ duh lo khalle nan si (command) a si.  Zo hrangah leilungpi hrangah.  Meifar a tleumi cu NInu ih tleu le Thlapa le Arfi pawl ih tleunak an bangaw lo cio.  Electricity le phazawngdiang (candle) ih tleunak le thazaang cahnak an dangdang.  Asina'n mah-le-tawk in an santlai fingfing.  Nangmah le keimah khal kan tleu daan an bangaw lo ciocio ding.  American pabik George Washington le Abraham Lincoln ih santlaihnak cio an bang lo nain ram le seenpi hrangah an tthahnem veve.  An tleunak ti sehla kan palh cuang lo ding.  Temple biakinnpi ih Peter le Johan in Kokka Mawi ih Kezengmi an damter vekin ECBC, Des Moines damnak dingah nang le kei cu Peter le Johan tlukin kan thupituk so khaw!  Na ruat dah maw?

2. Tleunak cu Nunpeknak (Sacrificial Life):  Phazawngdiang kan vangih a fung (body/ pumsa) a zup (melted) vingvo.  Candle ih a fung (pumsa) a ti a zup lole tleunak in pek thei lo.  Motor khal ka maung asile gas a cem, electric power kan hman asile a unit a rak cem.  Culawngah rawl kan suang thei, TV kan phuan, Computer kan zoh, ca kan siar - kan ngan thei.  Electric power tampi kan hmang asile bill tampi kan kuan.  Kapdang in kan sim asile midang hrang tthahnem dingin amaih sinak (identity) a liam.  Jesuh Khrih in, "Kei cu tleunak ka si" (Jn. 8:12) a ti vekin kan hrang a nunnak a pek.  Dungthluntu pawl khal saar-thih in ThuthangTha vaangah an nunliam ttheh.  Anmah ih nunpeknak ruangah "kawhhran" timi a nung.  Nang le kei tla Rundamnak ThuthangTha kan rak co ngah. 

Maih duhnak vekin meifar si tum hi lei minung pawlin kan duh ttheu.  Cuti si sehla candle cu a tizup a duh lo ding.  A tizup locun a tleunak a um fawn lo ding. A pumsa a tizup (thih) lawngah tleunak a suak.  Jesuh in meifar nan si in tinak cu Amaih duh vek kan si ding sawn.  

3. Sunglam Ral  (Inward Evil):  Candle a van (tleu) theinak dingah lo-theih-lo a ttulmi cu "thli" (Oxygen) a si.  Thli um lonak ahcun a vang thei lo lawlaw.  Asinain thli tam deuh a hraan asile candle a mit lohli.  Cucu, kapdang kan sim asile "Sunglam Ral" timi si.  Leilung tlun ral lakah ttihnungbik cu "Sunglam ral" tiah mifim le cangan thiam pawlin an sim.  American ih CIA mifim zetpa in kum 15 sung American thuthup cu Rusia hnen ah a zuar.  1998 ah an kai ngah ih ziangtin an tuah ka thei nawn lo.  Asinain, ziangzat America an sung ticu ruahban a si lo.  Ralkap, police, civil, mifim, professors tampi an that - sumpai, tikcu ziangmawzat a cem.  Jesuh Khrih khalin a lenglam lutmi hnakin sunglam ihsin a suakmi mi a baalter thei sawn a si (Mk. 7:15) a ti.

Jesuh Khrih khal a mah naibik/ theibik/ dungthluntu Judah Ischariot in a zuar.... Sayapa, ... a ti phah in a hnam (Matt. 26:49).  Kawhhran thuanthu kan zoh tik khalah Khrihfami pawlin Pathian mithmai kan balter thei sawn.  Mahatama Gandhi (Independence Father of India) in, "Khrih cu ka duh nain Christian si cu ka duh lo" a ti.  Law (upadi) degree laknak ding final paper tuah ding Afirca ram ih research (zingzoi) lai ah Mirang pawl church a va khawm zit saangkaa kiang a thleng, "Dog and Black are prohibited" (Uico le Midum luh a theih lo) timi signboard a hmu ni ihsin a nunsung Christian church a feh duh nawn lo tata.  Matt. 5 tlangpar thuzirhnak hi a kutken cabu a si.  

Hiti in kan sim tikah, "Ka pasal ruangah si! ... Ka nupi ruangah a si ... kei cu ka ttha nain" tiin na ruat thei.  Nu le pa cu kan ttha ... faate pawl ruangah si.  Faate in kan ttha ... nu le pa an ttha lo.... Kei cu ka ttha nain sungtel dang ruangah si na ti thei.  Cuhnak sawn in, "Aw keimah rori hi ka si bik ding" tihi thei sehla ... mifim pawl an sim ttheu bangin, "Ka aa maw - ka aa lo tihman a thei-aw lotu cu a aa tuk zo" an ti.  Minung in kan sual timi maih pumpak nun ih kan theih hi Rundamnak lamzin sangkaa onsaktu lamzin pakhat a umsun a si.  Ruangah, "Maw Bawipa, ka sual in ngaithiam vekin, midang ngaithiam theinak in pek aw!"  Maw Bawipa, na duhmi vek meifar in siter aw? Keimaih duhmi meifar in siter hlah?" tiin Pathian hmai ah khukbil in - nunnak hlanthar saal in ... kan sizat ... hi leipi ah meifar si hram uhsi!   AMEN.

July 05, 2015 (Sun. ) lakso saalmi a si.  Siartu pakhat cio hnen ah Pathian in malsawm hramseh!  AMEN

KAN THI DING

Posted by Piang Piang on June 7, 2015 at 11:10 AM Comments comments (1)
PITER 1:14 Kan Bawipa Jesuh khrih in fiang zetih I theiter zo vekin hi a thi theimi ka ruangpum cu ka taan cing ding ti ka thei. (Kan duh khal Le duh lo khal le Kan thi ding.) SAAM 90:10 Kan nundam kum cu kum sawm sarih Sung a si;Kan dam cak asile Kum sawmriat khal a si thei. (Na thi tik ah na thleng nak ding hmun Na thei fiang zo maw.) 1 JOHAN 5:12 Zokal fapa a neitu cu nunnak a nei; Pathian fapa a nei lotu cu nunnak a Nei lo. THUPHUAN 20:15 Zokhal nunnak cabu sungih hming ngan lomi cu meilipi sungah hlon an si. (Kan thi nu ah kan sual kan sir thei nawn lo ding. THUPHUAN 20:12 A thi ciami pawl cu a tum a Sen in Bawi tokham hmaiah an ding Ka hmu.

kawhhran than so nak ding ah tulbik mi.

Posted by Piang Piang on June 1, 2015 at 12:20 AM Comments comments (1)
Kawhhran than so nak ding ah. posture maw kan Thu pi? Decode maw kan Thu pi? Nubu maw kan Thu pi? MI no maw kan Thu pi? Awn Mawi maw kan Thu pi? Sunday school maw kan Thu pi? mission maw kan Thu pi? members maw kan Thu pi? Ziang na zum. Pakhat hman a tel lo. Kan thu pi bik mi cu. Pathian hi a si.

Pathian le Awnmawi (God and Music)

Posted by Pastor Biak on May 30, 2015 at 5:45 PM Comments comments (1)

Thuhmaihruai

ECBCY in "Awnmawi thawn Pathian thangthatnak" (Sing Song Service) caanttha in petu Pathian kan thangthat.  Kumkhat sungah veihnih kan nei.  Tumtahnak cu kan biakkhawmnak ah awnmawi thawn hlunghlei sinseh,  Mino tampi awnmawi (sak - tum - thiam) duhnak nei sinseh, seenpi in awnmawi duhnak hna karhzai sinseh timi hmuitinnak a si.

I.  Saam 148, 149, 150.  A minung pawlin awnmawi thawn thangthat ding a duhtu Pathian a si.

Amah thangthat dingah:- A vancungmi hmuahhmuah - 148:2; Ninu le Thlapa le arsi - :3; Nimthlakau, khawdur, thliasia - :8; Tlangsang/ niam - :9; Innzuat ttilva, hramlak ramsa, vate le bok vakmi - :10; Siangpahrang - :11; Fala le tlangval, Nutar le patar le nauhak - :12; Hla thar in - 149:1b; Laam phah in khuang le ttingttang - :3; A Biakinn sungah - 150:1; Nunnak a neimi hmuahhmuah in Bawipa cu thangthat uh - :6.

Saam hla saya in a nunram ih Pathian a tehtonnak (experiences) in a irhsuakmi a si.  A ruahnak men (theory) in a si lo. Midang hlaang/ cawi in a si lo. Nu le pa in faate nei sehla tiih nan ruahmi le nan neih taktak ih nan duhdawt daan a bang lo vekin.  A nunnak ih Pathian a thangthat sunloihnak a si.

II. Efesa 5:18 - 19.  A minung pawl khat-le-khat awnmawi thawn nun thianghlim nei ding a duhtu Pathian a si. 

"Zu ri hlah uh!  ... Thlarau thawn khat sawn uh! Pakhat -le - pakhat Saam hla, hlan-awknak hla, thangthatnak hla, hla thiang in bia aw uh! ... Bawipa cu ap-awknak hla le thangthatnak hla thawn nan thinlung takte in cawimawi uh!   Kol. 3:16 ... Hlan-awknak hla, ... hla thiang ... Nan lungawinak hla in Pathian kha thangthat uh!

In sawm, in zirh, in fial, zumtu pawl ih kan nundaan ding khal a si.  Hla ziangvekte khal kan sak hliarhlo cun a nuam. Bawipa khal a lungawi ding ka ring. Innzuat ttilva (eg: uite, zawhte, ar tiangmang) in music an duh in zum lole rak san (test) hnih?  Sceintists pawlin an hmuhsuak zomi (proof) cu pokpawr (tomato) music um lonak le music umnak an test ih Awnmawi umnak cu a rah a pawr cuang - a color a mawi deuh - a hmang a thaw ngai2 ti a si.

III. Minung pawl cun 'Ar' cu a dumlam (negative) lamhliir in kan hmang.  A sina'n Thukam Thar (NT) Jesuh cun, "Maw Jerusalem, Jerusalem, Arpi in a faate pawl a thlahnuai ih a uap vekin ... ka kut in ka hum ..." (Matt. 23:37).  Ziangdang lakah "Arpi" zukcuang (metaphor) hmang in a duhdawtnak a langter.  Mithiang Peter tthangphawktu 'Ar cang' ih khuan riangro cu (Matt. 26:75) a va nasa em!  Thlarau mit a mentertu ar-khuang a si.  Nunnak lamdik khihhmuhtu awnmawi a si ve lo maw!

Tlangkhuulnak

June 2013, "Ka Thlungte le Ka Zaihla" tiin TONIC SOLFA NOTATION le PRAISE & WORSHIP SERVICE HRUAIDAAN HRIHRAMPI  cabu fate ka ngan.  Thuhmaihurai ahcun tthalno sialsir khaute ih ai (au) aw cu Zinghmuh tlang kiangkap pawl cun "Biak-bai-rawk" tiin awnmawi (music) an bun, Vankau tlang ih a au tikah "Fiak-fai-rawk" an tiih, Meihlawl tlang lamih a ai ahcun "Cik-kuai-rem" an ti lala.  Zokhal a dikbik - a hmaanbik - a mawibik a um cuang lo.  Simduh sanmi cu awnmawi (music) hliir a cang tinak a si sawn - awfang an bun fingfing a si sawn.  Curuangah Pathian sersiammi vate le cucik kharbawk tiangin an aw neihsun in Pathian an thangthat minung pawlin musical note bun a si. 

Nangmah le keimah rori awnmawi thawn Pathian in Sersiamtu cu thangthat ding kan si.  Sunloih ding kan si.  Upatnak pek ding kan si.  Kanmah pawl khal khat-le-khat awnmmai (music) thawn pawlkom-awk ding kan si.   Amen.

Khristian Innsungsang

Posted by Pastor Biak on November 11, 2014 at 11:15 PM Comments comments (2)

Thuhmaihruai

Zarhkar (Sunday) veithum tiang "KHRISTIAN INNSUNGSANG" (Christian Family) tiin semrem ten hmangtluan thei dingah lam in hruaitu cu Pathian a si.  A hmin thianghlim cu thangtthat upatnak um hram sseh!  Dothnihnakah, Pathian ttihzah dingin zumnak thlaci ttha in cintu (thing-thu-mei-muahtu) pi-le-pu felfai kan neihmi siseh, in cawmdawl felfaitu nu-le-pa tthattha in thluasuahmi siseh, kan suahpi unau cio siseh kan lungawi. Kan biak Pathian in innsungsang duhnungte thawn kan mangman baan lo America ram ah nuncawkkhuar khawsak theinak in pek.  Makhleicemi cu America ramtthen sungih tlairawl tambik suahnak le ziangtik caan khalah hlawhfa pawl (employees) hnong dah lo ten Leipi killi ih ret theitu Iowa State le khawnuambik Des Moines ah in umter.  Amaih mission hrangah kawhhran duhnungza ECBC tawn nuamtlang theinak in pek.  Kan airport lutnak ahcun mawi demdem in "PROUD TO CALL DES MOINES HOME.  BUT, EVEN PROUDER OF OUR EMPLOYEES ALL AROUND THE WORLD" tiih catlang tarmi khal hin mithlaam a kam lawlaw.

Oct. 26, 2014 (Sun.)ni ah "PATHIAN HMUIHMEL KENGMI LE KAN INNSANG' (Seem. 1:16-28; Efe. 5, 6) ti'n tlangtar in kan hmutinmi cu kan innsungsang ahhin;  Pathian hmuihmel kan keng maw?  Pathian duhzawng pianhmang kan cuang maw?

Nov. 02, 2014 (Sun.)ni ah "A HARHDAMMI THINKUNG LE KAN INNSANG" (Matt. 7:15-20) timi calu bun in; A harhmi thingkung phunttha in rah ttha  a rah - hlingkung in hmang thawmi theitlai a rah dah lo ti sikhaw?  Kan innsang ah ziangvek rah kan rah? A hram in a harhdammi le phuntthami thingkung si ding kan nunnakah si hramseh!

Nov. 09, 2014 (Sun. )ni cu kan tlangtar netnak a si vekin "KAN RO ROH DINGMI LE KAN INNSANG" (Daan. 6:4-9; Jos. 1:5-9) hmang in; Ro timi hrilhfiangnak, Ziang ro kan roh ding?  Ziangtinso kan roh daan ding? timi hmuitinnak kan nei.  Judah siangpahrang Hezekiah (2Sph.18:3) le Josiah (2Sph. 22:2) an pu David siangpahrang ziaza an thluun ih Pathian duhzawng an tuah.  

Kan citlah ziang ro kan roh ding? Isau in a thinlung le a thluak le a mithmuhnak hramdan in "fapa upa sinak thluasuah" (birth right) cu a suangtuah, rikhiahnak a nei.  Jacob cu a taksa le a thinlung hnak ih thuuksin a thlarau in a pai' thluasuah a zoh.  A nui' zumnak le ttanpinak in ttihcing le khur phahin a hawl ngam.

Saam 16:5a "Maw Bawipa, nangmah cu ka ro le ka covo na si" a ti vekin Chin miphun hrangah Bawipa lawng kan ro le covo a si.

Isa. 33:6, "A minung pawl cu ... An ro tthabik cu Bawipa an ttihzahnak hi a si," Ezek. 44:28b (Daan. 10:9) "... Keimah hi an ttulmi an covo ka si" a ti vekin Chin miphun pawl hrangah Bawipa ttihzah, Pathian theih, Pathian duhzawng ziaza thawn nuncilh ...ttongdang kan sim asile... zumnak cu kan cithlah pawl kan roh dingmi ro a si.

Ziangti'n kan roh daan ding? timi ahcun; Eg: nga kaih daan cu lamzin tampi a um.  Suurvorh, ngasio, lenkhang, hrusut, khawkkhawm ..tvp.. a um na'n:  Zumnak ro roh dingah cun kan nunnak hrimhrim ih tarlang ding (nuncilh ding) lamzin pakhat-te lawng a um.  Khami cabu rak siar uh! - ka lo sim vekin thlun uh! - cuti'n khati'n tuah uh! tiih kaa lawng in sim a ngah lo.  Kan duhbikmi kan innsungsang ih kan nupi - kan pasal rundamnak congah dingah, kan sung-le-ril ih rah faate hrangah maih nunnak rori'h zohtthimtlak si a ttul si cu!

Kan pipu le kan nupa pawl ih in meimuahsakmi zumnak cu mit lo dingin pehzom in "Thingthu-mei-muahtu" dingah Pathian in vancung mi tthattha le leitlun ih mifim mithiam santlai zetzet pawl ai-in kan innsungsang hrang nangmah rori - keimiah rori in rinsan a si.

Cunti'n Zumnak Ro cu santhuan (new generation) ah cat lo ten pehzom in "Thingthu-mei-muah" lancih a si ding.

Siartu Pathian in thluasuah malza sawm hramseh!  AMEN




Sersiamtui' Kutzungmawi

Posted by Pastor Biak on October 7, 2014 at 8:50 PM Comments comments (0)

1. Sersiamtu Pathian

Ziangkim hi Pathian ih sersiammi (Seem. 1:1, Jn. 1:3) a si tiih kan zumnak cu kan lungawinak le hnangamnak sangbik a si.  Leipi ah mifim tampi le zirnak phunphun in ramsa abikin 'zawng' ihsin kan rungsuak timi Charles Darwin ih thu fehpi daan (theory) an pom.  Cutiin si sehla a tu thleng cun minung phunkhatkhat suaksaal awmtak khi a si.  Minung ih ruah theinak le tuah theinak cu rikhiah le tawpnak a nei.  Pathian cu a tawpnet dah lomi sersiamnak a si. Minung sersiamnak sungah thlarau, sia le ṭha theidan theinak, ruahkhaan theinak, pungzai le ṭhanso theinak ...tvp.. minung ih kan ruah ban lomi a telhcih thluh famkim.  Curuangah, minung cu ṭong - calai - zirnak - pehzomawknak ..tvp.. in kan ṭhangso vingvo.

Milai ih ruahnak le tuah theinak pawl cu rikhiah le tawp a nei.  Kan tuahmi hman Pathian tuah ciami cawn khi a si.  Eg: Vanzam cu 'vate' maw? tisung 'nga' maw? cawncop.  Color a phunphun khal cu thinghnah hramkung maw? van ih color maw? cawnsom hliir a si ko lo maw ka ti.

2. Kutzungmawi

Sersiammi tinkim bangrep thluh relrel sehla a nuam lo ding tiin ka ruat.  Minung tla cu sinak danghlam hleice "We areGod's masterpiece" (New Living Translation) Efe. 2:10 in a sim.  Kawl pawlin "Ruahnak bangrep ral tho" an ti kan hluan ding. Kan bangawk lonak - kan duhmi le ruahmi a dannak hi Amaih kutzungawinak a si sawn lo maw?

Pathian in siartu hnen malza sawm hramseh!

Pastor Biak.

NUN IN BUAIPI A PAIH NAWN LO

Posted by ECBCD on August 16, 2014 at 11:50 PM Comments comments (0)

NUN IN BUAIPI A PEIH NAWN LO
Hi pawl hin an nunnak ah Jesu Khrih an hmungah hnu ah a hlanih an buaipi bikmi pawl fehsan in Pathian duhzawng sawn in an nunnak ni an liam ter. Jesu siar lo buaipi tlakah an ruat nawn lo.

1. Christian pawl that le hro rero theutu "Saul" cun Damaskas khua ah Jesu thawn an hmuh awkngah hnucun thupi le ttul a ti bikmi pawl cu buaipi a paih nawn lo. A nunnak ih a buaipi bikmi cu "ziang tiin mi tampi Khrih dungthluntu" ah ka hruai thei ding tihi a si. Pathian mihman ropibik "Paul" ah a cang pan lo maw.(Tirh 9:1-17)

2. Mi hlothlau Samaria nu cun a tikhainak hmun ah Jesu a hmuh ngah hnu cun a tithawl tan in a     buaipi ttheu mi hmuahhmuah cu a buaipi paih nawn lo. Khaw sungah Jesu thu a aupi ciamco. A buaipi bikmi cu Jesuh kha rundamtu a siih mi hmuahhmuah in thei ve seh tihi a si. Thuanthuroling nunau misionary hmaisabikah a cang pan lo maw.(John 4:1-42)

3. Nga kai ih pumcawm Peter khal suur a vawrhnak Galilee tiva ah Jesu a tawngngah hnucun a suur le thupi ih a retmi hmuahhmuah a buaipi paih nawn lo. A buaipi bikmi cu Jesu ih tumtahmi thei le a fialmi rinum zetih ttuan hi a si. Bawipa ih a rinsan bikmi ah a cang pan lo maw. (Matt 4:18)

4. Josep cun nupi dingih a hammi Mary kha mi rinumlo ah a puh. Thlarau Thianghlim thil ti thei nak a si ti a fiang hnucun Mary le naute Jesu hrangah mualphonak a hril sawn. A buaipi bikmi cu Mary le Jesu an him theinak ding hi a si. Josep cu miropibik Jesu ih pa ah a cang pan lo maw. (matt 1:19-20)

5. Siahkhawngtu Zakia cun Jesu a hmungah hnucun hmakhua sialnak, paisa le duhhamnak a phun phun pawl cu a buaipi paih nawn lo. A buaipi bikmi hlan ih a thil ti sualmi hmuahhmuahhrangah ziang tiin thilttha thawn ka lehrul thei ding tihi a si. Zohthim tlak zumtu pacang ttha ah a cang pan lo maw. (Luke 19:1-9)

6. Bethany khua ih nunaunu in Jesu a hmungah hnucun alabaster rimhmui mankhung zet cu a buai pi paih nawn lo. A buaipi bikmi cu Jesu hrang ziang tiin thilthabik ka tuah thei ve ding tihi a si. A sualnak hmuahhmuah ngaihdam a si hleiah vanro luahtu dinhmun sawn a co pan lo maw.       (Mark 14:3-6)

Pathian thu lawng buaipi tlakah an ruat ruangah an sung maw? lamlam hlah. Bawipa in an lu ah hriak thar a culh ih an khuathai khal a liam hluahhlo sawn.(sam 23:5b) Lei daan ah harsa vek in lang hmanseh tisa mi ih hmuh ban lo vanlam malsawm hmuifu luangliam cu tiva kap ih a kho mi thinkung in tiva ta tidai a duh zatzat in a hawp thei bang in van malsawmnak cu an hawp ngah sawn riangri pan lo maw.

By,

Thian Awi Sang.

 

 

 

 

 

 

 

 

 


Rss_feed